Eins og síðustu ár verður boðið upp á langbröltið í haust, sem eru krefjandi og langar göngur en þó án þess að fara í of mikinn bratta (nema stutta kafla). Þannig að farið er meira á lengdina en bröttustu leiðirnar þó að búast megi við góðri hækkun í bland við ágætis vegalengdir.

Búast má við því að þátttakendur geti farið í krefjandi aðstæður út frá veðri og færð og þarf hver og einn að eiga eða hafa aðgang að búnaði til samræmis. Keðjubroddar (Esjubroddar) eiga að duga í allar göngur en ekki er útilokað að það þurfi jöklabúnað þó að ekki sé stefnt á það. Leiðsögufólk veitir leiðbeiningar um útbúnað og stofnaður er lokaður Facebook hópur þar sem hver ganga er kynnt og fjallað um aðstæður, hvernig við komumst á staðinn og fleira. Gert er ráð fyrir að hver og einn beri ábyrgð á að koma sér á staðinn en við stingum upp á stöðum til að hittast og sameinast í bíla. Sjá tengil á lokaða hópinn neðar í textanum.

Gengið er á fimmtudagskvöldum og svo eru helgargöngur á móti (stefnt er á að ganga á laugardögum en sunnudagar yfirleitt til vara ef veður hamlar för á laugardegi). Léttari leiðir verða fyrir valinu á fimmtudegi fyrir helgargöngu.
Hver ganga er tilkynnt í lokaða hópnum með eins til þriggja daga fyrirvara og verða leiðir valdar með hliðsjón af veðurspá og færð.

DAGSKRÁ

September: 7., 14., 16. (laugardag) og 28.
Október: 5., 7. (laugardag), 12., 19. og 26.
Nóvember: 2., 4.(laugardag), 9., 16., 23.,  25. (laugardag) og 30.

HELGARGÖNGUR• Hreggnasi og Rauðakúla í grennd við Ljósufjöll á Snæfellsnesi, 14 km/1200 m
• Glæsileg afréttarganga ofan Mýrdals að Gæsavatni og fleiri stöðum, 17,5 km/750m
• Umhverfis Hengil um gilin og hlíðarnar, 25 km/1200m
• Hvalfjarðarþrenna! Þyrill, Brekkukambur og Þúfufjall í einni ferð, 18 km/900 m

KVÖLDGÖNGUR
• Nokkrar leiðir á Esju og nágrenni (allt frá Skálafelli og út á Lág-Esju, sunnan og norðan megin)
• Lengri leiðir á fellin í nágrenni höfuðborgarsvæðisins
• Bláfjallahryggur og nágrenni
• Hengill og nágrenni
• Fjöll og fell í nágrenni við Kleifarvatn

VERÐ OG BÓKANIR
Verð fyrir manninn er kr. 63.000.

Bókanir fara fram á https://www.sportabler.com/shop/vesenisferdir (þið smellið á tengilinn, skráið ykkur inn og veljið það námskeið sem passar, greiðið og þá er allt klappað og klárt). Hægt er að prenta út kvittun í kerfinu og nýta til niðurgreiðslu stéttarfélags- eða vinnustaðar. Athugið að færslur frá bókunarkerfinu á bankareikningi eru merkt sem „æfingagjöld“.

Þá er einnig mögulegt að greiða með millifærslu. Greiðsla jafngildir bókun og merkið færsluna „meira“. Greiðið inn á reikning 0515-26-530314 kt. 530314-0650 og sendið staðfestingu á einarskula@hotmail.com.
Lágmarksfjöldi í hópnum er 25 en hámarksfjöldi 50.

Þegar bókun er lokið er hægt að sækja um aðgang að lokaða hópnum: https://www.facebook.com/groups/321744570420176

Afsláttarkjör: Þau sem voru skráð á Vesenisnámskeið í vor eða sumar 2023 eða til elli-og örorkulífeyrisþega. Veljið í bókunarferlinu.
Hægt er að sækja um fjölskylduafslátt sem virkar þannig að meðlimur í fjölskyldu nr 2 með sama lögheimili fær 15% afslátt. Látið vita á einarskula@hotmail.com.
Ekki er hægt að leggja saman afslátt til að fá hærra (hámarksafsláttur á hvern er 15%).

SKILMÁLAR

Athugið að Vesen og vergangur (Vesenisferðir ehf) tryggir hvorki farþega sína né farangur þeirra. Þátttakendur ferðast með á eigin ábyrgð. Félagið hvetur fólk til að kaupa ferða- og slysatryggingar, vera vel útbúið og kynna sér veður áður en lagt er af stað. Athugið að námskeiðsgjald fæst ekki endurgreitt eftir að námskeið er hafið en hægt er að framselja það til annars.
Fyrirvari er settur um röskun á prógramminu vegna Covid-19 eða hliðstæðra ástæðna eða veðurs en alltaf stefnt á að klára tilskilinn fjölda af göngum.