Vesen og millibrölt er námskeið og æfingaáætlun sem passar fyrir þá sem fara gjarnan á Úlfarsfell eða sambærilegt og geta hugsað sér að fara víðar. Gert er ráð fyrir að þátttakendur bæti þolið og styrkist og æfi sig jafnframt í ólíkum aðstæðum á hinum ýmsu fellum og lægri fjöllum í nágrenni höfuðborgarsvæðisins. Smátt og smátt verða göngurnar örlítið erfiðari til að auka hæfnina og að auki er miðlað fróðleik um náttúru, umhverfi og útbúnað.
Hist er einu sinni í viku á miðvikudögum frá byrjun september og öðru hvoru er helgarferð og fellur þá niður miðvikudagsganga á móti. Síðasta gangan er í byrjun aðventu. Miðað er við að ganga af stað kl. 18 á miðvikudögum og ca kl. 9 í helgargöngunni (fer þó eftir akstursvegalengd).
Alls eru 14 fjölbreyttar göngur á dagskrá og stefnt er á að fara aldrei sömu leið tvisvar í prógramminu þannig að þátttakendur kynnast mörgum leiðum og svæðum. Gert er ráð fyrir að þátttakendur taki svona gönguhreyfingu (eða annars konar hreyfingu) alls þrisvar í viku til að ná eðlilegum framförum.
Stofnaður hefur verið lokaður Facebook hópur fyrir þátttakendur og þar er tilkynnt um hverja göngu með 1-3 daga fyrirvara með hliðsjón af veðri og færð og miðlað ýmis konar fræðslu. Sjá tengil neðar á Facebook hópinn. Þátttakendur þurfa að eiga keðjubrodda (stundum kallaðir Esjubroddar) og höfuðljós fyrir þetta prógramm.

DAGSKRÁ
Dagskráin mótast af hópnum og veðri og aðstæðum. Dagsetningar fyrir göngurnar eru eftirtaldar:
September: 6. (miðvikud), 13. (miðvikud) 20. (miðvikud), 24. (sunnud)
Október: 4. (miðvikud), 11. (miðvikud), 15. (sunnud), 25. (miðvikud)
Nóvember: 1. (miðvikud), 5. (sunnud), 15. (miðvikud), 22. (miðvikud), 26. (sunnud)
Desember: 6. (miðvikud)

MIÐVIKUDAGSGÖNGUR: Þær göngur sem eru í potti fyrir virku kvöldin eru: Sköflungur, Lokufjall og Hnefi, Blákollur, Grímannsfell, Selfjalls- og Lækjarbotnahringur, Stardalshnúkur, Esjuhlíðar, Bláfjallahryggur, Vatnshlíðarhorn og Fagridalur, Helgafell, Mosfell, Búrfellsgjá, Arnarfell og Bæjarfell, en ekki útilokað að eitthvað hér detti út og annað komi inn ef aðstæður kalla á það.

SUNNUDAGSGÖNGUR: Við stefnum á eftirtaldar leiðir: Vík – Reynisfjall – Mýrdalur 9 km/250 m, þar sem gengið er út á brún á Reynisfjalli og gengið aftur til baka og niður gömlu þjóðleiðina og svo staldrað við í gamla hellinum þar sem Jón eldklerkur hafði vetursetu og að lokum niður í Reynisfjöru. Vatnafell, Skonsudalur og Horn á Snæfellsnesi 7 km/380 m, þar sem má sjá einstæðar móbergsmyndanir auk fallegs útsýnis og umhverfis. Þúfufjall, Hvalfirði 6 km/480 m, sem er vestan megin við Brekkukamb og ofan við Bjarteyjarsand og í grennd við Ferstiklu. Árnastígur, Eldvörp, Tyrkjabyrgi og hluti Prestastígs 13 km/200 m, þar sem má sjá fallegar gamlar þjóðleiðir, hina einstæðu gígaröð Eldvörp og dularfullu Tyrkjabyrgin.

TEYMIÐ
Teymið sem hefur umsjón með göngunum samanstendur af Einari Skúlasyni, Birnu Maríu Þorbjörnsdóttur, Gunnari Gunnarssyni, Elísabetu Snædísi og fleirum úr Veseni og vergangi. Þau hafa öll mikla og fjölbreytta reynslu af fjallamennsku og að leiða hópa við ýmsar aðstæður í göngum.

VERÐ OG BÓKANIR
Verð fyrir manninn er kr. 53.000.

Bókanir fara fram á https://www.sportabler.com/shop/vesenisferdir (þið smellið á tengilinn, skráið ykkur inn og veljið það námskeið sem passar, greiðið og þá er allt klappað og klárt). Hægt er að prenta út kvittun í kerfinu og nýta til niðurgreiðslu stéttarfélags- eða vinnustaðar. Athugið að færslur frá bókunarkerfinu á bankareikningi eru merkt sem „æfingagjöld“.

Þá er einnig mögulegt að greiða með millifærslu. Greiðsla jafngildir bókun og merkið færsluna miðvikud. Greiðið inn á reikning 0515-26-530314 kt. 530314-0650 og sendið staðfestingu á einarskula@hotmail.com.
Lágmarksfjöldi í hópnum er 20 en hámarksfjöldi 50.

Þegar bókun er lokið er hægt að sækja um aðgang að lokaða hópnum á Facebook: https://www.facebook.com/groups/1316809778975246

Afsláttarkjör: Þau sem voru skráð á Vesenisnámskeið í vor eða sumar 2023 eða til elli-og örorkulífeyrisþega. Veljið í bókunarferlinu.
Hægt er að sækja um fjölskylduafslátt sem virkar þannig að meðlimur í fjölskyldu nr 2 með sama lögheimili fær 15% afslátt. Látið vita á einarskula@hotmail.com.
Ekki er hægt að leggja saman afslátt til að fá hærra (hámarksafsláttur á hvern er 15%).

SKILMÁLAR

Athugið að Vesen og vergangur (Vesenisferðir ehf) tryggir hvorki farþega sína né farangur þeirra. Þátttakendur ferðast með á eigin ábyrgð. Félagið hvetur fólk til að kaupa ferða- og slysatryggingar, vera vel útbúið og kynna sér veður áður en lagt er af stað. Athugið að námskeiðsgjald fæst ekki endurgreitt eftir að námskeið er hafið en hægt er að framselja það til annars.
Fyrirvari er settur um röskun á prógramminu vegna Covid-19 eða hliðstæðra ástæðna eða veðurs en alltaf stefnt á að klára tilskilinn fjölda af göngum.