Gönguklúbburinn Vesen og vergangur er öllum opinn. Markmið hans er að skapa samfélag allra sem vilja njóta útivistar og göngu í náttúrunni. Göngur án endurgjalds eru auglýstar með viðburðum á facebook síðu.  Greitt er fyrir þátttöku í ferðir, námskeið og lokaða hreyfihópa (brölthópa).

Vesen og vergangur gætir þess að vera í sambandi við landeigendur á þeim svæðum sem farið er um ef ástæða er til. Vesen og vergangur leggur áherslu á að versla við heimamenn í nærumhverfi áfangastaða, t.d. við kaup á leiðsögn, ráðgjöf, gistingu, mat og annan aðbúnað.

Allir í hópnum geta skipulagt göngu á Facebook síðu Vesens og vergangs og eru hvattir til þess. Sá sem skipuleggur göngu ákveður leiðina með eigin reynslu og þekkingu í huga. Minnt er á að þegar gengið er í hóp er miðað við gönguhraða hópsins en um leið er fólk beðið um að velja göngur við hæfi út frá viðburðalýsingu og áætluðum gönguhraða (hægt að sjá út frá áætluðum göngutíma). Hlutverk þess sem skipuleggur göngu er að ákveða dagsetningu, tímasetningu og skoða veðurspá og færð og meta áhættu í samræmi við aðstæður.  Í sumum tilfellum er upplýsingum safnað um leiðina eða um eitthvað í tengslum við hana og kynnt hópnum á leiðinni.

Meginreglan um auglýsingar á Facebook vegg hópsins er að þar eru auglýstar gönguferðir á vegum Vesens og vergangs. Það eru til undantekningar og þá eru það auglýsingar um göngur sem eru ekki á vegum skipulagðra ferðafélaga eða fyrir góðan málstað, einnig geta það verið auglýsingar um sértilboð á búnaði eða öðru sem tengist gönguferðum til Vesenisfélaga. Við reynum að túlka þetta svigrúm þröngt, því að annars er hætta á að veggurinn fyllist af auglýsingum um hitt og þetta. Vesen – félagslíf síðan á Facebook leyfir allar auglýsingar.

Eitt af því skemmtilega sem gerist eftir göngur er þegar göngumenn deila myndum. Best er að deila myndum inni á vegg viðburðar fyrir gönguna sjálfa, ekki á facebook vegg hópsins. Þannig er auðveldar að finna allar myndirnar aftur fyrir þá göngu. Við hvetjum alla sem birta myndir sínar á samfélagsmiðlum að nota myllumerkið vesenogvergangur til að merkja myndirnar. #vesenogvergangur eða #vesen og ártalið #vesen22, #vesen23 o.s.frv.