Vesen og millibrölt er námskeið og æfingaáætlun sem passar fyrir þá sem fara gjarnan á Úlfarsfell eða sambærilegt og geta hugsað sér að fara víðar. Gert er ráð fyrir að þátttakendur bæti þolið og styrkist og æfi sig jafnframt í ólíkum aðstæðum á hinum ýmsu fellum og lægri fjöllum í nágrenni höfuðborgarsvæðisins. Smátt og smátt verða göngurnar örlítið erfiðari til að auka hæfnina og að auki er miðlað fróðleik um náttúru, umhverfi og útbúnað.

Hist er einu sinni í viku á þriðjudögum frá því í ágúst og öðru hvoru er laugardagsganga og síðasta ganga er í byrjun aðventu. Flestar kvöldgöngur eru framan af til að nýta birtuna en dregur úr þeim þegar á líður. Miðað er við að ganga af stað kl. 18 á þriðjudögum og kl. 9 í helgargöngunni (fer þó eftir akstursvegalengd).

Alls verða 17 fjölbreyttar göngur á dagskrá og stefnt er á að fara aldrei sömu leið tvisvar í prógramminu þannig að þátttakendur kynnast mörgum leiðum og svæðum. Gert er ráð fyrir að þátttakendur taki svona gönguhreyfingu (eða annars konar hreyfingu) alls þrisvar í viku til að ná eðlilegum framförum.

Stofnaður hefur verið lokaður Facebook hópur fyrir þátttakendur og þar er tilkynnt um hverja göngu með 1-3 daga fyrirvara með hliðsjón af veðri og færð og miðlað ýmis konar fræðslu. Sjá tengil neðar á Facebook hópinn.  Þátttakendur þurfa að eiga keðjubrodda (stundum kallaðir Esjubroddar) og höfuðljós fyrir þetta prógramm.

DAGSKRÁ

Dagskráin mótast af hópnum og veðri og aðstæðum. Við höfum valið að vera með potta af mögulegum göngum og svo veljum við úr þeim miðað við veður og aðstæður. Tilkynnt er um hverja göngu í lokaða hópnum með eins til þriggja daga fyrirvara og þar koma fram allar upplýsingar um gönguna og hvernig á að komast á staðinn. Við hittumst gjarnan í útjaðri höfuðborgarsvæðisins og deilum bílum að göngustað.

ÞRIÐJUDAGSGÖNGUR:   Þær göngur sem eru í potti fyrir virku kvöldin eru: Eyrarfjall, Blákollur, Grímannsfell, Meðalfell, Selfjalls- og Lækjarbotnahringur, Þverárkotsháls, Geitahlíð og Eldborg, Esjuhlíðar, Bláfjallahryggur, Sveifluháls, Helgafell, Mosfell, Búrfellsgjá, Arnarfell og Bæjarfell, en ekki útilokað að eitthvað hér detti út og annað komi inn ef aðstæður kalla á það.

LAUGARDAGSGÖNGUR: Við stefnum á eftirtaldar leiðir: Gamla leiðin um Bröttubrekku í Dölum 9 km/350 m. Hún er norðan megin við samnefndan þjóðveg enda var bílvegurinn lagður örlítið sunnar en gamla leiðin. Við stefnum einnig á að fara á hið þjóðfræga fjall Skjaldbreiður 8,5 km/500m sem er norður af Þingvöllum. Þá er á stefnuskránni að ganga eftir Reynivallarhálsi endilöngum 8,5-9 km/400 m eða að Reynivallarkirkju. Svo ætlum við einnig á toppinn Álút ofan við Hveragerði 9 km/450 m.

Dagsetningar fyrir göngurnar eru eftirtaldar

Ágúst

20. ágúst (þriðjud), 24. ágúst (laugard), 27. ágúst (þriðjud)

September

3. sept (þriðjud), 10. sept (þriðjud), 17. sept (þriðjud) og 24. sept (þriðjud).

Október

1. okt (þriðjud), 5. okt (laugard), 8. okt (þriðjud), 15. okt (þriðjud), 22. okt (þriðjud) og 29. okt (þriðjud)

Nóvember

2. nóv (laugard), 12. nóv (þriðjud), 16. nóv (laugard), 30. nóv (laugard)

TEYMIÐ

Teymið sem hefur umsjón með göngunum samanstendur af Einari Skúlasyni, Gunnari Gunnarssyni, Elísabetu Snædísi, Rakel, Kristínu Silju og fleirum úr Veseni og vergangi. Þau hafa öll mikla og fjölbreytta reynslu af fjallamennsku og að leiða hópa við ýmsar aðstæður í göngum.

VERÐ OG BÓKANIR

Verð fyrir manninn er kr. 63.000.

Einungis kvöldgöngur verð kr. 44.000.

Einungis helgargöngur verð kr. 29.000.

Bókanir fara fram á https://www.sportabler.com/shop/vesenisferdir (þið smellið á tengilinn, skráið ykkur inn og veljið það námskeið sem passar, greiðið og þá er allt klappað og klárt). Hægt er að prenta út kvittun í kerfinu og nýta til niðurgreiðslu stéttarfélags- eða vinnustaðar. Athugið að færslur frá bókunarkerfinu á bankareikningi eru merkt sem „æfingagjöld“.

Þá er einnig mögulegt að greiða með millifærslu.  Greiðsla jafngildir bókun og merkið færsluna þriðjud. Greiðið inn á reikning 0515-26-530314 kt. 530314-0650 og sendið staðfestingu á einarskula@hotmail.com.

Lágmarksfjöldi í hópnum er 20 en hámarksfjöldi 50.

Þegar bókun er lokið er hægt að sækja um aðgang að lokaða hópnum á Facebook (hópur er sameiginlegur með miðvikudagshópi)

Afsláttarkjör: Þau sem voru skráð á Vesenisnámskeið í vor eða sumar 2024 eða til elli-og örorkulífeyrisþega. Veljið í bókunarferlinu.
Hægt er að sækja um fjölskylduafslátt sem virkar þannig að meðlimur í fjölskyldu nr 2 með sama lögheimili fær 15% afslátt. Látið vita á einarskula@hotmail.com.
Ekki er hægt að leggja saman afslátt til að fá hærra (hámarksafsláttur á hvern er 15%) og athugið að afsláttarkjör eru einungis í heildarpakka ekki ef valdar eru bara kvöldgöngur eða bara dagsgöngur.

SKILMÁLAR

Athugið að Vesen og vergangur (Vesenisferðir ehf) tryggir hvorki farþega sína né farangur þeirra. Þátttakendur ferðast með á eigin ábyrgð. Félagið hvetur fólk til að kaupa ferða- og slysatryggingar, vera vel útbúið og kynna sér veður áður en lagt er af stað. Athugið að námskeiðsgjald fæst ekki endurgreitt eftir að námskeið er hafið en hægt er að framselja það til annars.
Fyrirvari er settur um röskun á prógramminu vegna Covid-19 eða hliðstæðra ástæðna eða veðurs en alltaf stefnt á að klára tilskilinn fjölda af göngum.